Latvejis viesturē pyrmū reizi teik saskaiteiti ari latgalīšu volūdys lītuotuoji. Bīdreiba “Latgolys Saeima” aicynoj sabīdreibu pīvērst tam uzmaneibu i tautys skaiteišonys anketā napalaist garom vaicuojumu, kurymā kotram, kas runoj, roksta, skaita voi vysmoz klausās latgalīšu volūdu, ir īspieja atzeimēt, ka tei jūprūjom teik lītuota.
Latgalīšu navaļstiskajom organizacejom izadeve panuokt Ministru kabineta nūsacejumu izmainis. Vaicuojums tautys skaiteišonys anketā ir nūformulāts atbylstūši pašreizejai Latvejis Vaļsts volūdys lykumā lītuotai terminologejai: “Vai Jūs lietojat latviešu valodas paveidu — latgaliešu valodu?”, iz kuru ir divejis atbiļdis “Jā” voi “Nē”.
Juoatguodynoj, ka da 10. martam kotrs var elektroniski aizpiļdēt anketu škārsteiklā tautasskaitisana.lv. Vysus kasdīnys škārsteikla lītuotuojus aicynojam izmontuot itū pyrmreizejū īspieji — deļ tam ka vysleidz vysus, kas nabyus par sevi elektroniski īdavuši informaceji, piec tam tiks maklāti sātā nu tautys skaiteišonys veiciejim.
Anketā var aizpiļdēt informaceji par sevi i sovim saimis lūceklim. Kai ari aicynojam sovim draugim, rodim i dorba kolegom stuosteit par itū unikalū īspieji i napalaist garom attīceigū vaicuojumu i nūruodeit latgalīšu volūdys lītuošonu!
Latgalīšu volūdai kai viesturiskai latvīšu volūdys daļai ir eipaša vīta Latvejis volūdu saimē. Tuos lītuotuoju skaits ir gona lels, bet da šam ni reizis tys nav precizai nūskaidruots, deļ tam tautys skaiteišona ir eistais laiks tū izdareit.
Juris VIĻUMS, Bīdreibys “Latgolys Saeima” vaļdes prīšksādātuojs
0 komentāru